തണുപ്പുള്ള മാസങ്ങളിൽ ബദാം, ഉണക്കമുന്തിരി കുതിർത്ത് കഴിക്കാമോ?

ഡിസംബർ അടുക്കുകയാണ്. തണുപ്പുള്ള മാസങ്ങളിൽ ജലദോഷം, ചുമ പോലുള്ള സീസണൽ രോഗങ്ങൾ കൂടുതലായി വരാറുണ്ട്. അതിനാൽ ഈ സമയങ്ങളിൽ രോഗപ്രതിരോധശേഷി വർധിപ്പിക്കുന്നതിന് സഹായിക്കുന്ന ഭക്ഷണങ്ങൾ കഴിക്കണം. ബദാമും ഉണക്കമുന്തിരിയും ഇതിനുള്ള മികച്ച ഭക്ഷണങ്ങളാണ്. 

ബദാം, ഉണക്കമുന്തിരി കഴിച്ച് ദിവസം തുടങ്ങാൻ ആരോഗ്യ വിദഗ്ധർ നിർദേശിക്കാറുണ്ട്. അതല്ലെങ്കിൽ ദിവസത്തിലെ ഭക്ഷണത്തിനിടയിലെ ലഘുഭക്ഷണമായി കഴിക്കാം. സാധാരണയായി, ശൈത്യകാലത്ത് അവ കുതിർത്ത് കഴിക്കാമോ?. കൊളസ്‌ട്രോളോ ബ്ലഡ് ഷുഗറോ ഉള്ളവർ എത്രമാത്രം കഴിക്കണം? എന്ന ചോദ്യം പലരും ചോദിക്കാറുണ്ട്. ഇതിന് മറുപടി നൽകുകയാണ് ഡൽഹി ഇന്ദ്രപ്രസ്ഥ അപ്പോളോ ഹോസ്പിറ്റലിലെ ന്യൂട്രീഷ്യനിസ്റ്റ് നാരംഗ്.

എന്തുകൊണ്ട് ബദാമും ഉണക്കമുന്തിരിയും?

ചീത്ത കൊളസ്‌ട്രോളിന്റെ അളവ് കുറയ്ക്കാൻ സഹായിക്കുന്ന മോണോസാച്ചുറേറ്റഡ് കൊഴുപ്പുകളാൽ സമ്പന്നമാണ് ബദാം. അവയിൽ സസ്യാധിഷ്ഠിത പ്രോട്ടീനുകൾ അടങ്ങിയിട്ടുണ്ട്. വിറ്റാമിൻ ഇ, മഗ്നീഷ്യം, കാൽസ്യം, പൊട്ടാസ്യം തുടങ്ങിയ അവശ്യ വിറ്റാമിനുകളും ധാതുക്കളും അവയിൽ നിറഞ്ഞിരിക്കുന്നു. വിറ്റാമിൻ ഇ ഓക്‌സിഡേറ്റീവ് നാശത്തിൽ നിന്ന് കോശങ്ങളെ സംരക്ഷിക്കുന്നു, അതേസമയം മഗ്നീഷ്യം, പൊട്ടാസ്യം എന്നിവ രക്തസമ്മർദം നിയന്ത്രിക്കാൻ സഹായിക്കുന്നു. ലയിക്കുന്ന നാരുകളുടെ നല്ല ഉറവിടമായ ബദാം ദഹനം മെച്ചപ്പെടുത്താനും പൂർണത നിലനിർത്താനും സഹായിക്കുന്നു. ശരീരഭാരം നിയന്ത്രിക്കാനും സഹായിക്കും.

ഉണക്കമുന്തിരി ആന്റിഓക്‌സിഡന്റുകളുടെയും നാരുകളുടെയും ധാതുക്കളുടെയും ശക്തികേന്ദ്രമാണ്. അവയിൽ പ്രകൃതിദത്ത പഞ്ചസാര അടങ്ങിയിട്ടുണ്ട്. അവയിൽ പോളിഫെനോളിക് സംയുക്തങ്ങൾ അടങ്ങിയിട്ടുണ്ട്, പ്രത്യേകിച്ച് ഫ്ലേവനോയിഡുകൾ. ഇത് ശരീരത്തിലെ വീക്കവും ഓക്സിഡേറ്റീവ് സമ്മർദവും കുറയ്ക്കാൻ സഹായിക്കും. ഇരുമ്പ്, പൊട്ടാസ്യം എന്നിവയാൽ സമ്പുഷ്ടമാണ്, കൂടാതെ നാരുകളും കൂടുതലാണ്.

ശൈത്യകാലത്ത് ബദാമും ഉണക്കമുന്തിരിയും കുതിർക്കണോ?

ബദാം രാത്രി മുഴുവൻ കുതിർക്കുന്നത് അവയുടെ ദഹനക്ഷമതയും പോഷകങ്ങളുടെ ആഗിരണവും മെച്ചപ്പെടുത്തുന്നു. കുതിർക്കുമ്പോൾ എൻസൈം ഇൻഹിബിറ്ററുകൾ നീക്കംചെയ്യുന്നു, ബദാമിലെ വിറ്റാമിനുകളും ധാതുക്കളും നന്നായി ആഗിരണം ചെയ്യാൻ ശരീരത്തെ അനുവദിക്കുന്നു. കൂടാതെ, ബദാം കുതിർത്ത് കഴിക്കുന്നതിലൂടെ ദഹനസംബന്ധമായ അസ്വസ്ഥതകൾ ഉണ്ടാകാനുള്ള സാധ്യതയും കുറവാണ്. ഉണക്കമുന്തിരി കുതിർക്കുന്നതിലൂടെ അവയുടെ ദഹനക്ഷമതയും ആന്റിഓക്‌സിഡന്റ് പ്രവർത്തനവും വർധിപ്പിക്കും. ഇത് രോഗപ്രതിരോധ സംവിധാനത്തിന് ആവശ്യമാണ്, പ്രത്യേകിച്ച് തണുപ്പുള്ള മാസങ്ങളിൽ.

എത്ര കഴിക്കാം?

ദിവസവും ഒരു പിടി ബദാം (ഏകദേശം 20-25 ബദാം) കഴിക്കുന്നത് ശരീരഭാരം കൂട്ടാതെ ചീത്ത കൊളസ്ട്രോൾ കുറയ്ക്കാൻ സഹായിക്കുമെന്ന് പഠനങ്ങൾ തെളിയിച്ചിട്ടുണ്ട്. ഉയർന്ന കൊളസ്ട്രോൾ ഉള്ളവർ പ്രതിദിനം അഞ്ച് മുതൽ 10 വരെ ബദാം കഴിക്കണം. ഉണക്കമുന്തിരിക്ക് കുറഞ്ഞ ഗ്ലൈസെമിക് സൂചികയുണ്ട്, അതായത് മിതമായ അളവിൽ കഴിക്കുമ്പോൾ അവ രക്തത്തിലെ പഞ്ചസാരയുടെ അളവിൽ വലിയ കുതിച്ചുചാട്ടത്തിന് കാരണമാകില്ല. രക്തത്തിലെ പഞ്ചസാര നിയന്ത്രിക്കുന്ന ആളുകൾക്ക് ഒരു പിടി ഉണക്കമുന്തിരി (ഏകദേശം 20-25 ഗ്രാം) സമീകൃതാഹാരത്തിന്റെ ഭാഗമാക്കാം. അമിതമായ പഞ്ചസാരയുടെ ഉപഭോഗം ഒഴിവാക്കാൻ ബദാം പോലുള്ള പ്രോട്ടീൻ അടങ്ങിയ ഭക്ഷണങ്ങളുമായി ഉണക്കമുന്തിരി സംയോജിപ്പിക്കുക. 5-10 ബദാമും ഒരു ചെറിയ പിടി (ഏകദേശം 10-15) ഉണക്കമുന്തിരിയുമാണ് ശുപാർശ ചെയ്യുന്നത്. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• ടൈപ്പ് 2 പ്രമേഹ സാധ്യത കുറയ്ക്കാനും ഹൃദയാരോഗ്യം മെച്ചപ്പെടുത്താനും അവോക്കാഡോയ്ക്ക് കഴിയുമോ?
• ഉപ്പ് കഴിക്കുന്നത് കുറയ്ക്കൂ; ഹൃദയാഘാത മരണങ്ങളും വൃക്ക രോഗങ്ങളും കുറയ്ക്കാമെന്ന് ഡബ്ല്യുഎച്ച്ഒ
• പഴങ്ങൾ കഴിക്കുമ്പോഴും പച്ചക്കറി ജ്യൂസ് കുടിക്കുമ്പോഴും ഈ 5 കാര്യങ്ങൾ ശ്രദ്ധിക്കുക
• രക്തത്തിലെ പഞ്ചസാരയുടെ അളവ് നിയന്ത്രിക്കണോ? ഈ ഭക്ഷണങ്ങൾ കഴിക്കാം